తిరుచానూరు ఆలయంలో శ్రీ పద్మావతి అమ్మవారికి జరిగే వివిధ సేవలు

 తిరుమల శ్రీవారికి లాగానే అమ్మవారికి కూడా విశేష సేవలు జరుగుతూ ఉంటాయి వాటి వివరాలు 

నిత్యోత్సవం 

• ఇవి ప్రతిరోజు జరిగే ఉత్సవాలు 
• ప్రతి రోజు అమ్మవారికి సుప్రభాత సేవ, మూలమూర్తికి సహస్రనామార్చన తరువాత నివేదన జరుగుతుంది.
• ప్రతి రోజు నిత్యా కల్యాణోత్సవం జరుగుతుంది 
• ప్రతి రోజు సాయంత్రం అమ్మవారికి డోలోత్సవం జరుగుతుంది 
• రాత్రి ఏకాంతసేవతో సేవలు ముగుస్తాయి.

వారోత్సవాలు 

ప్రతి వారం జరిగే ఉత్సవాలు 

• ప్రతి సోమవారం అమ్మవారికి అష్టదళపాద పద్మారాధన జరుగుతుంది 
• గురువారం రోజు తిరుప్పావడ మూలమూర్తికి జరుగుతుంది 
• శుక్రవారం రోజు మూలమూర్తికి అభిషేకం జరుగుతుంది 
• శుక్రవారం రోజు కల్యాణోత్సవం ముందు లక్ష్మి పూజ జరుగుతుంది.
• శుక్రవారం రోజు తోట ఉత్సవం జరుగుతుంది అనగా కల్యాణోత్సవం తరువాత గుడికి దక్షిణ దిక్కులో వున్న శుక్రవారపు తోటకు వెళ్లిన తరువాత మధ్యాహ్నం 3 గంటలకు పసుపు, చందనం మొదలగు ద్రవ్యాలతో అభిషేకం జరుగుతుంది.
• శుక్రవారం రోజు ఉంజల్ సేవ తరువాత గ్రామోత్సవం జరుగుతుంది.
• శనివారం ఉదయం పుష్పాంజలి సేవగా పద్మాలతో మూలమూర్తికి పుష్ప అర్చన జరుగుతుంది.

నక్షత్రోత్సవాలు 

• ప్రతి నెల ఉత్తరాషాఢ, ఏకాదశి రోజులలో అమ్మవారి ఉత్సవమూర్తికి ఏకాంతంగా అభిషేకం జరుగుతుంది.
• ఉత్తరాషాఢ నక్షత్రం రోజు సాయంత్రం అమ్మవారు గజవాహనం మీద దర్శనమిస్తారు.

సంవత్సరంలో జరిగే ఉత్సవాలు 

• ఉగాది రోజు ఉత్సవాలు జరుగుతాయి, పంచాంగ శ్రవణం జరుగుతుంది 
• వైశాఖ పూర్ణిమకు మూడురోజులపాటు వసంతోత్సవాలు జరుగుతాయి, పౌర్ణమి రోజు స్వర్ణరథోత్సవం జరుగుతుంది 
• జ్యేష్ఠా పౌర్ణమికి పూర్తి అయ్యేటట్లు ఐదురోజుల పాటు తెప్పోత్సవాలు జరుగుతాయి 
• భాద్రపద మాసంలో పౌర్ణమినాటికీ పూర్తి అయ్యేటట్లు మూడురోజుల పాటు పవిత్రోత్సవాలు జరుగుతాయి. 
• కార్తీక మాసంలో అమ్మవారికి బ్రహ్మోత్సవాలు జరుగుతాయి, పంచమి తీర్థం రోజు విశేషంగా భక్తులు అమ్మవారిని దర్శిస్తారు.
• బ్రహ్మోత్సవాలు ప్రారంభం ముందు రోజు లక్ష కుంకుమార్చన జరుగుతుంది 
• బ్రహ్మోత్సవాలు తరువాత శ్రవణానక్షత్రం రోజున పుష్పయాగం జరుగుతుంది. 
• పుష్యమాసంలో అమ్మవారికి ప్రతి శుక్రవారం ప్రతేక్య పూజలు జరుగుతాయి.